Kryetari i Partisë Demokratike, Sali Berisha, ka thirrur një protestë kombëtare për të martën, më 26 nëntor, në orën 17:00, si reagim ndaj vendimit të Gjykatës Kushtetuese, i cili i ka dhënë të drejtë SPAK në hetimet ndaj tij.
“Me datën 26 është protesta tjetër kombëtare, më e fuqishmja që ka njohur Shqipëria,” deklaroi Berisha.
Vendimi i Kushtetueses rrëzoi kërkesën e Berishës për shpalljen antikushtetuese të masës së sigurisë “detyrim me paraqitje” të dhënë nga GJKKO me kërkesë të SPAK, lidhur me aferën e privatizimit të ish-kompleksit sportiv “Partizani.”
Sipas akuzave të SPAK, Berisha ka favorizuar dhëndrin e tij, Jamarbër Malltezi, si pronar i terrenit ku më pas u ndërtuan 19 kulla. Kushtetuesja e cilësoi të drejtë veprimin e SPAK për të anashkaluar Kuvendin në vendosjen e kësaj mase, duke argumentuar se ajo nuk cenon funksionet e deputetit apo të drejtën e tij për të ushtruar detyrën.
Berisha, megjithatë, e cilëson këtë një sulm të papranueshëm ndaj tij dhe ka vendosur ta adresojë me një tubim masiv.
