Në një fjalim të mbajtur para qytetarëve, lideri i opozitës Sali Berisha sfidoi publikisht kryeministrin Edi Rama për një debat ballë për ballë, duke e akuzuar për vjedhje sistematike të taksave të qytetarëve dhe keqmenaxhim të buxhetit të shtetit.
“Unë e kam ftuar Edi Ramën të vijë këtu dhe prap e ftoj, të dalim ballë për ballë. Ai të marrë suflerë unë vetëm tek. Ai le ti rreshtojë suflerët mbrapa, unë vetëm.
Urdhëro zoti Rama, urdhëro hajde këtu, me statistika të institutit tënd, të faktojmë, të faktojmë se kush i çove paratë e shqiptarëve. Por nuk del dot, nuk ja mban. Sepse ka vjedhur, ka vjedhur dhe vetëm ka vjedhur”.
Berisha deklaroi se programi i tij politik bazohet në rikthimin e taksave tek qytetarët, duke premtuar rritje të ndjeshme të investimeve në arsim, bujqësi dhe shëndetësi, si dhe vendosjen e një page minimale prej 500 eurosh dhe një minimumi jetik për qytetarët shqiptarë.
“Paratë që do të përdorim janë taksat tuaja. Nuk bëjmë asgjë tjetër veçse ua kthejmë ato juve”, theksoi Berisha, duke shtuar se qeveria aktuale vetëm i ka shfrytëzuar dhe vjedhur këto para.
Ai solli krahasime konkrete me Malin e Zi dhe Rumaninë, duke treguar se në këto vende pensionet dhe pagat minimale janë rritur ndjeshëm gjatë dekadës së fundit, ndërsa në Shqipëri janë stagnuar, megjithëse çmimet janë rritur me 250%.
“Në vitin 2013, pensionisti shqiptar merrte 143 mijë lekë, sot merr vetëm 172 mijë, ndërkohë që në Mal të Zi pensioni mesatar është rritur në 450 mijë lekë”, argumentoi Berisha.
Ai akuzoi Ramën se ka përdorur buxhetin publik vetëm për interesa klienteliste, duke ndarë shuma minimale për pensionistët dhe duke i lënë qytetarët të përballen me një rritje të papërballueshme të çmimeve.
Sfida dhe batutat:
Në përfundim të fjalimit, Berisha e sfidoi sërish kryeministrin: “Hajde, Edi Rama, dalim ballë për ballë! Ti merr suflerët, rreshtoi mbrapa, unë dal vetëm tek”, deklaroi ai.
“Urdhëro këtu, me statistikat e tua të institutit, të faktojmë ku i çove paratë e shqiptarëve! Por nuk del dot, nuk ja mban, sepse ka vjedhur, ka vjedhur dhe vetëm ka vjedhur!”, përfundoi Berisha, duke e shoqëruar fjalën me një thirrje të drejtpërdrejtë për transparencë.
