Ish-kryeministri i vendit, Sali Berisha, gjatë një postimi në rrjetin social facebook, lidhur me zhvillimet më të fundit në politikën e vendit, nuk ka hezituar të tallet me kryeministrin Rama.
Sipas Berishës, Rama e përdor kushtetutën e vendit sipas dëshirës së tij personale.
Postimi i plotë:
Të dashur miq, ndaj kërkesës së kreut të opozitës, Lulzim Basha, për dialog pa kushte, Rama përdor për bllokim kushtet dhe si mburojë kushtetutën.Mirëpo për Edvinin, libri themelor i shtetit një herë quhet Kushtetutë e herën tjetër prostitutë!
Kështu, në vitin 2007, kur ai kërkoi shtyrjen, dhe zgjedhjet u shtynë tre muaj vetëm për certifikatën e gjendjes civile për zgjedhësin, e cila në Tiranë dhe 70% të vendit lëshohej nga bashkitë socialiste, ajo nuk ishte Kushtetutë, por ishte thjesht prostitutë!
Kurse tani që Rama ka mbushur vendin me drogë, banda, krim dhe që opozita kërkon qeveri teknike dhe shtyrje të zgjedhjeve për të patur zgjedhje të lira, Rama mbron karrigen e tij duke thënë se shtyrjen e zgjedhjeve nuk e lejon Kushtetuta, sikur nuk ishte kushtetuta që lejoi shtytjen e zgjedhjeve në vitin 2007, apo sikur ajo lejon mbushjen e vendit me drogë dhe krim, të lidhur direkt me Edvinin.
Kësaj i thonë: karrigia e para!
Në veprat e Remarkut është një personazh në një spital psiqiatrik, i cili për shkak të sëmundjes, në varësi nga hëna ndërronte emrin kur i shkonte e dashura për vizitë, njëherë e priste si Albert e herën tjetër si Robert!
Me këtë rast i bëj thirrje Edi Ramës, të heqë çdo kusht dhe t’iu pergjigjet thirrjeve të opozitës, por edhe të aleatit në qeverisje të tij, mos të bllokojë, por të nisë menjeherë dhe pa kushte dialogun për zgjidhjen e krizës së rëndë të vendit!
