Belgjika ka siguruar kualifikimin për në çerekfinalet e Botërorit të Rusisë në sekondat e fundit të përballjes me Japoninë. Një ndeshje mjaft e vështirë për “Djajtë e Kuq” të cilët vuajnë shumë në pjesën e dytë, por një kundërsulm kur kishin mbetur edhe 20 sekonda lojë ka bërë mrekullinë duke e finalizuar me Chadli në rrjetë. Tani Belgjika duhet të përgatitet për ndeshjen e radhës, pasi do të përballet me Brazilin.
Belgët e nisin mirë ndeshjen me një dominim të lehtë, por Japonia fiton terren dhe me shpejtësinë që e karakterizon kërkon të befasojë në kundërsulm. Nuk kishte shumë për tu treguar në pjesën e parë, vetëm goditjet e shumta të Lukakut që neutralizohen nga portieri japonez.
Në pjesën e dytë Japonia zbret në fushë mjaft të motivuar dhe Harraguchi befason belgët me një kundërsulm dhe e dërgon topin në rrjetë.
Vetëm pas katër minutash vjen dhe goditja e dytë, një supergol nga Inui, i cili godet nga jashtë zone dhe topi përfundon në rrjetë.
Belgjika mobilizohet në sulm dhe Martinez bën disa zëvendësime, të cilat qëllojnë mjaft deçizive. Është Vertongen autori i golit të parë, një lloj autokritike pasi kishte faj në golin e parë dhe e shpërblen me një gol mjaft të bukur.
Vetëm pesë minuta më pas është Fellaini i cili godet topin me kokë pas një krosimi mjaft të mirë nga Hazard dhe e dërgon në rrjetë.
Ndeshja po shkonte drejt shtesave dhe dukej se të dy ekipet ishin dorëzuar, Japonia provon me Hondan në minutën e fundit të shtesës nga një goditje dënimi, por Cortuis pret dhe nga duart e tij nis kundërsulmi “vrasës”. Është De Bruyne që hap një top perfekt në të djathë për Munier dhe ky i fundit e hedh në zonë ku është Lukaku i cili sheh Chadlin që vjen nga pas dhe e lë topin për të që nuk mund të gabonte nga një distancë e tillë.
Belgjika në këtë mënyrë pret biletën për në fazën çerekfinale të Botërorit të Rusisë, ku do të gjejë Brazilin.
