Vjen reagimi i parë nga Greqia, pas vendimit të gjykatës shqiptare për ta lënë në burg të Fredi Belerit, i cili përmes avokatëve kërkoi të lirohet për t’u betuar si kryebashkiak i Himarës.
Është partia e ekstremit të djathtë “Zgjidhja Greke”, që përmes një retorike të ashpër sulmon kryeministrin Qirjako Miçotaqi, për mosbërjen e maksimumit të tij në “mbrojtje të helenizmit të Vorio-Epirit.
Në një reagim të publikuar nga mediat greke, kjo forcë politike flet ndër të tjera për “spastrim etnik të Epirit të Veriut nga regjimi shqiptar”.
Nënkryetari i kësaj partite Kyriakos Velopoulos, e quan kryeministrin Edi Rama si “persekutor i grekëve”.
“Regjimi Rama e ndaloi kryebashkiakun e zgjedhur të Heimarrës, Fredi Beleri, të merrte pjesë në ceremoninë e betimit të tij dhe e mban të mbyllur në burgjet e Tiranës. Sot vërtetohet krimi i qeverisë Mitsotakis dhe i PtD-së, të cilët në vend që të shterrnin çdo mjet për të mbrojtur helenizmin e Vorio-Epirit, organizuan ekspozita për “krijimet artistike” të persekutorit të grekëve! Zgjidhja Helenike kërkon përdorimin e çdo mjeti të mundshëm, në mënyrë që Rama të largojë duart e tij të pista nga helenizmi i Vorio Epirit. Heshtja tani përbën bashkëpunim në spastrimin etnik të Epirit të Veriut nga regjimi shqiptar”.
Kujtojmë se Beleri qëndron pas hekurave me akuzën e korrupsionit në zgjedhje, pasi u kap në flagrancë duke paguar 400 mijë lekë të vjetra për të blerë 8 vota, një ditë para zgjedhjeve vendore në Shqipëri. Po ashtu vlen të theksohet se ndonëse Fredi Beleri është i deklaruar si anëtar i minoritetit grek, Himara dhe banorët e saj nuk njihen si të tillë nga Shqipëria.
