Paraditen e sotme, kryeministri Edi Rama, para dibranëve premtoi se Rruga e Arbrit nuk do të jetë më iluzion.
Fjalën e kanë marrë një sërë personalitetesh të politikës, e ndërsa Ruzhdi Lata, kryetar i Komunës së Dibrës, lëshoi një deklaratë të fortë, që mori menjëherë duartrokitjet e të pranishmëve.
Duke vënë theksin në punën e palodhur të kryeministrit Rama, ai kërkoi prej tij që Dibra të bëhet një lagje e Tiranës, dhe kjo arrihet vetëm falë Rrugës së Arbrit.
“Kam nderin që t’ju përcjell përshëndetjet për këtë vepër madhore nga sheshi i Dibrës, dhe të gjithë bashkërisht të urojmë, të përshëndesim kryetarin e qeverisë shqiptare, kryeministrin Edi Rama.
Do të jem pak i shkurtër, por dua të them vetëm disa fjalë. Politikanët e sotëm, pak, rrallë përmendin rilindjen kombëtare. Unë mendoj se sot është vendi dhe momenti të kujtoj në mesin tuaj Sami Frashërin e madh, i cili para 150 vitesh ka shkruar veprën “Shqipëria ç’ka qenë, çështë dhe çdo bëhet”.
Ç’ka qenë; e kemi lexuar.
Ç’ka është e përjetojmë, ç’ka do bëhet; varet prej të gjithë ne.
Mirëpo për dibranët është një kontrast jetik dhe historik.
Me shekuj kemi marrë pjesë në rindërtimin e Stambollit, me dekada kemi marrë pjesë në ndërtimin dhe rindërtimin e Shkupit. Gati një shekull kemi marrë pjesë në ndërtimin dhe rindërtimin e Tiranës.
Tashmë në kohët e fundit marrin pjesë ne ndërtimin dhe rindërtimin e një pjesë të Manhattan të New York-ut. Vallë kush do t’ia kthejë këtë mirësi Dibrës dhe dibranëve?
Është momenti, është koha, është fati i jetës për shpresë e karrierë që këtë të mirë, Dibrës t’ia kthejë kryeministri i Shqipërisë, z. Edi Rama.
Unë shpeshherë e kam përmendur se Dibra është prej Mavrovës -Kala të Dodës. Po kam kaluar edhe më tej prej thënieve të mia, që Dibra është lagje e Tiranës, por lagje e Tiranës- Dibren e bën vetëm se Ruga e Arbrit, realizimi i premtimit të dhënë nga kryeministri shqiptar, Edi Rama.
Zotëri kryeministër ju dëshiroj shëndet, sukses në punë dhe bëje Dibrën lagje të Tiranës”, përfundoi fjalën Ruzhdi Lata.
