Conor McGregor edhe pse u mposht në kafaz nga Khabib Normagomedov duket se nuk e sheh veten aspak humbës. Një ditë më parë ai njoftoi se nuk është dorëzuar dhe se do të rikthehet në kafaz për një revansh. Ndërsa ditën e sotme i ka befasuar të gjithë me një postim në Twitter ku shprehet: “Ne humbëm duelin, por fituam betejën. Lufta vazhdon”.
Irlandezi këtë koment e ka shoqëruar me një foto të shkrepur pas duelit dhe ku duket qartë e nxira në syrin e majtë, dëmtim që e ka pësuar nga rusi. Por kjo betejë vazhdoi edhe pasi gjyqtari e ndali atë në raundin e katërt, me sportistët dhe stafet e tyre që u përleshën në kafaz dhe jashtë tij, duke krijuar një kaos në stadium.
We lost the match but won the battle.
The war goes on. pic.twitter.com/CRtPaGfOnn— Conor McGregor (@TheNotoriousMMA) October 8, 2018
Por kjo deklaratë e fundit e Conor McGregor është vërtet sfiduese karshi rezultatit që solli përballja mes dy sportistëve në kafaz, ku fitoi Nurmagomedov. Irlandezi, më herët pat deklaruar se kërkon revanshin dhe se do të rikthehet në kafaz. Për momentin situata është në “stand by”, pasi incidenti që ndodhi pas duelit është duke u hetuar nga Komisioni i Sportit në Nevada, që pritet të marrë një vendim.
Ndërsa presidenti i UFC-së duke pasur parasysh përleshjen që pati në fund të duelit është shprehur se nuk do ketë revansh: “Fillimisht duhet të jemi gjakftohtë dhe të ulemi e të shohim se çfarë prodhoi ky event, kjo sfidë. Të shohim se përse ndodhi ai incident dhe të shohim se çfarë vendimi do të marrë Komisioni i Sportit të Nevadës. Kam 18 vjet që e bëj këtë punë dhe nuk kam përjetuar kurrë një moment të tillë.
Por për një gjë jam i sigurt në mendjen time, se nuk do të ketë kurrë një revansh mes Khabib dhe Conor në të ardhmen, sado fitimprurës të jetë ai event. Nuk duam të krijojmë një ngjarje të dytë të shëmtuar si kjo që ndodhi në UFC-229”, tha Dana White.
