Askush nuk di asgjë për gjendjen shëndetësore të Michael Schumacher, që pas aksidentit që pësoi 5 vite më parë në Meribel të Francës. Familjarët e tij janë kujdesur që të mos rrjedhë asnjë informacion. Por pak ditë më parë ishte prifti Georg i cili foli rreth gjendjes së tij, të cilin e kishte vizituar në vitin 2016.
Por deklarata më e fortë vjen nga Jean Todt, ish-drejtuesi i njohur i Ferrarit. 72-vjeçari i ka befasuar të gjithë teksa ka zbuluar se e ka ndjekur bashkë me legjendën gjermane të Formula 1 Çmimin e Madh të Brazilit, që u zhvillua 11 nëntorin e kaluar.
“Jam gjithmonë shumë i kujdesshëm kur them diçka, por është e vërtetë që Çmimin e Madh të Brazilit e kam ndjekur bashkë me Michael në Zvicër.”
Jean Todt, në respekt të privatësisë së kërkuar nga familjarët e ish-pilotit të famshëm të Formula 1 nuk dha asnjë informacion më të detajuar për gjendjen e tij. Todt ka qenë në krye të Ferrarit në vitet e arta të trofeve të Schumit. Ai e viziton shpeshherë 7 herë kampionin e botës në rezidencën e tij në Gland të Zvicrës.
