Kryeministri i Kosovës, Ramush Haradinaj nuk ka ndërmend ta heqë taksën 100% për produktet serbe, edhe pas ultimatumit dhënë nga përfaqësuesja e lartë e BE-së, Federica Mogherini.
Haradinaj tha në seancën për politikën e jashtme se kjo e fundit i ka të metat e veta dhe se ka vend për kritikë, por taksa nuk do të hiqet derisa Serbia nuk e njeh Kosovën si shtet i pavarur dhe sovran.
“Ne po prisnim nga BE që të ndalej agresioni i Serbisë, por kjo nuk ndodhi. Ata (serbët) duan të mbajnë një konflikt të ngrirë. Ne kemi toleruar shumë gjëra, me shpresën se komuniteti ndërkombëtar do të gjente një zgjidhje, por nuk po e shohim atë”, tha Haradinaj duke iu referuar kërkesës së Mogherinit.
Po ashtu, kryeministri i Kosovës u shpreh se në 10 vitet e fundit, ai ka mësuar se përshtatja dhe tolerimi në rrethana të caktuar nuk mjafton, pasi nuk ka ndryshuar asgjë.
“Unë mendoj që masat që janë vendos me produktet që vinë nga Serbia, duhet të jenë të përhershme deri në njohje. Derisa Serbia nuk e njeh Kosovën si shtet të pavarur dhe sovran, nuk duhet t’i heqim. Ju siguroj që pa një qasje të këtillë është e pamundshme të arrihet një marrëveshje ndërkombëtare, ligjërisht obligative e njohjes të ndërsjellët, nëse nuk e kemi këtë qëndrueshmëri, nëse nuk dimë të qëndrojmë, atëherë ne vet po heqim dorë nga vetvetja e pse të na pranojë tjetri, harrojeni këtë”, ka thënë Haradinaj.
Ai pati edhe një lutje për sipërmarrësit e Kosovës:
Haradinaj: Zori na ka pru këtu ku jemi
“I lus sipërmarrësit tonë të na kuptojnë, nuk e kemi bërë këtë si kundërmasë ndaj sipërmarrësit tonë, ose ndaj atyre që ushqejnë mijëra familje se kanë njerëz në punë, nuk e kemi bërë për hatër të produkteve vendore, se nuk është ashtu, e kemi bërë prej zorit, zori na ka pru këtu ku jemi, por pa u hequr ky zor nuk është mirë askush me keqpërdorë këtë situatë, qoftë me i rrit çmimet, qoftë me kujtu që bëjnë presion mbi qeverinë me çmime, mos ta mendojnë kështu, mos të marrin ndonjë këshillë nga vendi fqinjë, rriteni çmimet se qeveria lëshon pe, mosni ashtu se nuk është rruga e duhur, i shkaktoni telashe vetit dhe neve por nuk dilet nga kjo gjendje ashtu, nuk është rrugë ajo, të rrimë bashkë sepse kemi me ia dalë bashkë”, ka thënë Haradinaj.
