Kreu i Partisë Demokratike, Lulzim Basha, ka reaguar pas lirimit të Haradinajt. Basha shkruan se drejtësia franceze mori vendimin e duhur, ndërsa konsideroi urdhër-arrestet e Serbisë si një sulm që po i bëhet Kosovës, popullit dhe integrimit të saj.
Gjithashtu, Basha bëri thirrje që Serbia të anulojë urdhër-arrestet për luftëtarët e Kosovës, ndërsa qeveria shqiptare të ushtrojë presion ndaj shtetit serb.
Postimi i Bashës:
Ndava me kënaqësi lajmin se drejtësia franceze mori më në fund vendimin e duhur për Ramush Haradinajn, duke e lënë atë të lirë për t’u kthyer në atdhe. Vendimi i sotëm është drejtësia e plotë, pas shumë javësh qëndrimi në Francë.
Urdhër arrestet e Serbisë janë jo vetëm padrejtësi personale ndaj njerëzve si Ramushi që kanë sakrifikuar për lirinë e Kosovës, por njëkohësisht sulm ndaj vetë pavarësisë, ndaj Republikës së Kosovës dhe integritetit të saj politik.
Me vendimin e sotëm të drejtësisë franceze, Serbia duhet të ndërgjegjësohet një herë e mire, e të anulojë urdhër arrestet e saj për luftëtarët e Kosovës.
Po kështu është detyrë kryesore e qeverisë shqiptare që të ushtrojë presion ndaj Serbisë dhe kërkesa ndaj vendeve të tjera, për të detyruar Beogradin të heqë dorë nga praktika e turpshme, e padrejte dhe provokative e urdhër arresteve te tilla në mënyrë që padrejtësi si kjo me Ramushin të mos përsëriten më.