“Dua sot t’ju falënderoj nga zemra gjithsecilin prej jush, qindra mijëra shqiptarë, që sfiduat frikën, që sfiduan provokimet, që sfiduan propagandën qeveritare, që u ngrit me besimin e zemrës për të ardhmen tuaj në sheshin e Republikës së Re. Mirënjohja ime është mirënjohja e miliona shqiptarëve sot për aktin madhor që shpallëm dje Republikën e Re, Republikën tuaj.
Dua të falënderoj në veçanti ata mijëra të rinj dhe të reja, studentë të sapodiplomuar, të punësuar apo të papunë, brezin e ri që e kishte mbushur si asnjëherë sheshin e lirisë dhe që votoi për Republikën e Re me praninë tij.
Dua të falënderoj qëndrestarët e 18 shkurtit dhe “Çadrës së Lirisë”, kantierit më të mrekullueshëm që ka njohur Ballkani, e djeshmja ishte dita e cilësisë më të lartë politike në historinë e Shqipërisë dhe kjo është merita e zemrës dhe shpirtit tuaj.
Nuk shpiket dot, nuk ka akademi politike t’i trajtojë njerëzit, as universitet as konsulent që ta bëjën këtë ashtu siç e bëtë ju!
Këtu ku triumfon e vërteta mbi rrenën dhe mashtrimin, realiteti mbi fasadën, liria mbi frikën. Këtu u lartësuan vlerat e vërteta, objektivi dhe vendimi që shpallëm dje, ai nuk më takon mua, i takon çdo shqiptari!
Faleminderit, mirënjohje të thellë këtij monumenti të lirisë, kësaj shkolle të të drejtave dhe lirive njerëzore dhe civile. Sot ju jeni mishërimi, prova e gjallë e identiteti evropian të shqiptarëve, jeni përfaqësuesit e denje të Shqipërisë, të vendosur ndaj së djeshmes që po largohet nga Republika e Vjetër e drogës, e vesit, e virtytit.
Këtu lindi dhe u bë realitet Republika e Re.
