Kryetari i Partisë Demokratike, Lulzim Basha, duke folur sot nga “Çadra e Lirisë”, me rastin e 1 prillit ironizoi koalicionin 4-vjeçar të qeverisë .
Gjithashtu, Basha rikonfirmoi për të disatën herë kërkesën e tij për qeveri teknike.
“Sot është 1 prilli, dita e gënjeshtrave dhe ditëlindja e koalicionit të gënjeshtrave. Me siguri, në paktin e 1 prillit 2013, teksa përpunoheshin mashtrimet e mëdha për shëndetësinë falas, për 300 mijë vende pune, bashkautorët kanë qeshur, sepse kanë menduar se kjo ishte dita për t’i trajtuar shqiptarët si budallenj që mund t’i gënjesh, mund t’i mashtrosh, mund t’ua marrësh votat dhe pastaj të bësh çfarë të duash me to.
Sot, 7 javë pasi shqiptarët qëndrojnë në shesh me trup, me mendje dhe me shpirt, ata kanë një mesazh për Edi Ramën dhe për koalicionin e 1 prillit: budalla është ai që pranon të trajtohet si budalla dhe shqiptarët kanë vendosur të mos pranojnë më kurrë të trajtohen si të tillë nga një bandë hajdutësh e bërë njësh me krimin. Sot, më 1 prill, budallenjtë janë ata që qëndrojnë pas fasadave, që mendojnë ende se gjërat mund të zgjidhen me pazare dhe me mashtrime.
Sot ata duhet të kuptojnë të vërtetën: zgjidhja e vetme është qeveria teknike, e cila do të luftojë drogën, do të zbatojë dekriminalizimin dhe do të organizojë zgjedhje të lira dhe të ndershme” – përfundoi Basha.
Tirana Today
