Deputeti Lulzim Basha vahzdon të këmbëngulë se projekt-ligji “Për Dhënien e Amnistisë Penale” do të falë edhe zyrtarët e korruptuar të dënuar nga GJKKO.
Gjatë fjalës së tij në foltoren e Kuvendit, Basha e konsideroi si një pazar kundër SPAK-ut, teksa tha se nga amnistia penale përfiton edhe ish-Sekretarja e Përgjithshme e Shëndetësisë, Joana Duro e dënuar me 2 vite e 8 muaj burg për korrupsionin me tenderët.
“Amnistia nuk përfshin protestuesit masivisiht e opozitës të akuzuar për nenin 236/2 kundërshtim i punonjësve të policisë. Propozimi prek vetëm nenin 236/1. Asnjë opozitar nuk përfiton, përfitojnë zyrtarët e korruptuar. Është e qartë se ky pazar i ulët është një pazar anti-drejtësi, një pazar anti-SPAK, përfitojnë të korruptuarit, dënohen dhe përjashtohen nga përfitimi ata që janë ngritur kundër korrupsionit dhe kriminalizimit të shtetit duke përfshirë zyrtarë të lartë të çështjeve që gjoja janë nën hetim parlamentar siç është ish-sekretarja e përgjithshme e shëndetësisë.”, tha Basha.
Ndërkohë, pas kësaj deklarate ka replikuar ministri i Drejtësisë, Ulsi Manja, i cili tha se Basha po e lexon ligjin mbrapsht.
“Me këtë që sapo tha z.Basha i paska thënë lamtumirë zanatit të juristit. Kur e lexon ligjin, e lexon mbrapsht. Mos e merrni seriozisht. Ju ftoj që kur të vijë debati për ligjin e amnistisë të bëjë propozimet e veta dhe të njihet me risitë e amnistisë. Të thuash po lirohen të dënuarit nga GJKKO, duhet të jemi pak serioz. Gjithçka ka një limit.”, tha ai.
