Sekretari i Përgjithshëm i PD, Gazment Bardhi është shprehur këtë të mërkurë se nuk do të marrë pjesë në mbledhjen e Komisionit të Etikës, së pari sepse ky institucion i partisë nuk ekziston dhe së dyti, sepse ai jep llogari para Këshillit Kombëtar.
“Jam njohur me një kërkesë të Komisionit të Etikës, që nuk ekziston në PD, që do duhet të shkoj për të dhënë llogari për vendimet e mia. Llogari Sekretari i Përgjithshëm i jep vetëm Këshillit Kombëtar të PD që mblidhet nesër dhe ftoj çdo koleg të marrë pjesë në mbledhjen legjitime”, tha Bardhi.
Kryesia e Partisë Demokratike doli me një deklaratë mbrëmjen e djeshme dhe kërkoi nga Gazment Bardhi që të japë “llogari” për veprimet e tij.
Deputetja demokrate Flutura Açka, e cila muaj më parë ka deklaruar dorëheqjen nga Komisioni i Etikës, sipas Bardhit, ka reaguar në Facebook dhe thotë se ajo është rikthyer si kryetare. Madje, Açka thotë se ftesën e ka marrë nga vetë Bardhi.
“Jam kthyer me ftesë të mikut tim, Gazmend Bardhi. Kjo ftesë që kam marrë nga z. Bardhi, në cilësinë e Sekretarit të Përgjithshëm të PD-së e shpjegon kthimin tim. Besova se ishte çasti që PD të dilte nga agonia, dhe ftesa e tij kishte shumë kuptim për mua.
Ndaj u ktheva, dhe jam sot në cilësinë që më kanë dhënë demokratët, dhe asnjë emër i përveçëm: Kryetare e Komisionit të Apelimit, Integritetit dhe Etikës së Partisë Demokratike”, shkruan Flutura Açka.
