Kreu i PD-së Lulzim Basha është shprehur që akuzën dhe denoncimin e bërë nga Gazment Bardhi ndaj Olsi Ramës në lidhje me laboratorin e drogës në Xibrakë, e ka bërë që në 2018 dhe pret që Apeli të vendosë.
Basha tha se nga drejtësia pret një zbardhje të plotë të kësaj çështjeje.
“Unë atë çështje e kam çuar në Apel dhe pres që Apeli ta vendosë në bazë të së drejtës, ndërsa për akuzën që është shpalosur që në 2018, pres që drejtësia të bëjë zbardhjen e saj të plotë. Denoncimi publik është forma më e lartë që mund të bëjë dikush dhe unë i kam bërë thirje drejtësisë që atëherë të bëjnë punën e tyre dhe e përsëris sot”, tha Basha.
Kreu demokrat tha se nga SPAK ka pritshmëri të larta, ndërsa shtoi se politika duhet ta mbështesë. Basha hodhi akuza ndaj qeverisë duke thënë se i ka kufizuar burimet SPAK sepse këta të fundit i kanë shkelur në kallo.
“Pritshmërie e mia ndaj SPAK janë shumë të larta. SPAK duhet ta justifikojë këtë besim. Politika duhet të qëndrojë larg. Jemi para shansit historik për të qenë të barabartë para ligjit. Puna e SPAK është e rëndësishme, inkurajimi dhe mbështetja është shumë e rëndësishme. Qeveria i ka kufizuar burimet për SPAK, dhe është e natyrshme, sepse SPAK i ka shkelur në kallo”, tha Basha.
Sa u takon hetimeve për protestën e 21 Janarit, ai tha se mbështet drejtësinë në zbardhjen e kësaj çështjeje pa ndërhyrje dhe pa lojëra politike.
“Nuk më vjen mirë që ka 13 vite që kjo çështje përdoret e keqpërdoret politikisht. Mbështetja ime për drejtësinë ka qenë zbardhja e kësaj ngjarjeje, pa ndërhyrje politike, i qëndroj 100% kësaj”, tha Basha.
