Barcelona ka mposhtur Interin në Camp Nou me rezultatin 2-0 dhe ka marrë kryesimin e grupit. Katalanasit edhe pse luanin pa Lionel Messin kanë dominuar këtë takim dhe nuk i kanë lejuar zikaltërit të rrezikojnë në asnjë moment portën e Ter Steger.
Miqtë bëjnë shumë gabime, sidomos në krahun e djathtë me D’Ambrosio dhe Candreva që nuk ishin në ditën e tyre më të mirë. Gjithsesi, ishte Icardi ai që kishte një mundësi të mirë në minutën e 25’, por në fund të aksionit ai rrëzohet me shpresën për të fituar një penallti. Ish-interisti Rafinha ishte një nga më të mirët në fushë, dhe ishte pikërisht ai që zhbllokoi rezultatin në minutën e 3’. Hera e parë që Inter i dha aq shumë hapësirë katalanasve dhe ata e kanë ndëshkuar.
Edhe pas pushimit Barça dikton ritmin e lojës, ndërsa Zikaltrit e kanë të vështirë të futen në lojë dhe të depërtojnë në gjysmëfushën e vendasve. Rastet për gol janë më të shpeshta për Barça-n, dhe kjo për shkak se Inter tani luan më përpara në kërkim të golit të barazimit. Skuadra e Spalletti-t bëhet më e rrezikshme me futjen në fushë të Keita dhe Martinez, por goli duket shumë larg. Ndërkohë në minutën e 83’ erdhi goli i nokautit nga Jordi Alba. Mbrojtësi spanjoll finalizon një aksion të bukur të vendasve duke mbyllur ndeshjen.
PSG-Napoli është mbyllur në barazim 2-2. Ka qenë një rast i humbur nga italianët, që kanë kryesuar ndeshjen deri kur kishin mbetur edhe dy minuta nga fundi. Takimi i zhvilluar në “Parkun e Princave” është zhbllokuar në minutën e 29-të nga një gol i realizuar nga Lorenzo Insigne. Sulmuesi italian ka mposhtur portierin Areola me një goditje të bukur parabël pas pasimit të marrë nga Callejon.
Fati i ka buzëqeshur vendasve në minutën e 61-të, kur Mario Rui ka devijuar në portën e tij një krosim të Meunier. Gjithsesi, 13 minuta para fundit, Napoli ka rigjetur avantazhin me Mertens. Në minutën e 82-të ka qenë radha e portierit Ospina të bëjë rolin e heroit, duke ndalur një goditje dënimi të rrezikshme të Neymar. Minutat e fundit janë mbyllur me francezët në sulm dhe tentativat e lojtarëve të Tuchel që kanë gjetur golin e barazimit në minutën e 93-të me një magji të Di Maria.
Takimi tjetër i këtij grupi, ai i zhvilluar në “Anfield Road” mes Liverpool dhe Crvena Zvezda-s, është fituar me rezultatin e pastër 4-0 nga vendasit. Firimino ka realizuar në minutën e 20-të për“Të Kuqtë”, teksa goli i dytë ka ardhur në fundin e pjesës së parë pas një kombinimi të Shaqirit me Salah. I pari ka dhënë asistin, ndërsa i dyti ka dërguar topin në rrjetë. Egjiptiani ka qenë protagonist edhe në minutën e 51-të, duke transformuar në gol penalltinë e fituar nga Mane. Ky i fundit ka gabuar në të 77-ën nga pika e bardhë, por e ka shlyer këtë gabim duke realizuar golin e katërt dhe të fundit të ndeshjes tri minuta më vonë.
“Të Kuqtë” kryesojnë grupin me 6 pikë, një më shumë se Napoli i bendit të dytë dhe dy më shumë se PSG-ja e vendit të tretë. Vetëm 1 pikë Crvena Zvezdën e vendit të fundit.
Ndërkohë, Porto kryeson e vetme Grupin D pas fitores 3-1 të marrë në transfertë kundër Lokomotivës së Moskës. Një ndeshje kjo që ka filluar mirë për rusët, të cilët kanë fituar një penallti në minutën e 10-të, por që është pritur nga legjenda Iker Casilla-s. Nuk ka bërë të njëjtin gabim Marega, i cili është treguar i saktë nga pika e bardhë në minutën e 26-të.
Herrea ka dyfishuar avantazhin e portugezëve në të 35-ën, para se Miranchuk të ngushtonte diferencat në tri minuta më vonë. Goli që ka vendosur ndeshjen ka ardhur në minutën e 47-të dhe është shënuar nga Corona, i cili ka vulosur fitoren e miqve. Vendasit e kanë mbyllur ndeshjen me 10 lojtarë pas kartonit të kuq të marrë Kvirkvelia.
Portugezët kryesojnë grupin me 7 pikë, dy më shumë se Schalke, që ka barazuar 0-0 në fushën e Galatasaray, me këta të fundit që mbajnë vendin e tretë me 4 pikë. Grupi mbyllet nga Lokomotiva e Moskës, që nuk ka marrë asnjë pikë pas 3 ndeshjesh.
Ndërkohë Borussia Dortmund ka marrë një fitore të madhe ndaj Atletico Madrid. Të besuarit e Favre kanë fituar 4-0 ndaj spanjollëve të Diego Simeone-s dhe vazhdojnë të kryesojnë grupin me pikë të plota. Ishte Witsel ai që kaloi vendasit në avantazh në minutën e 38’, ndërsa Guerreiro (73’, 89′) dhe Sancho (83’) vulosën fitoren. Një fitore e merituar e gjermanëve, të cilët po kalojnë një nga momentet më të mira të viteve të fundit.
