Barcelona nuk njeh pengesa në LaLiga, java e 12-të e vuri përballë Leganes dhe arriti ta fitojë këtë ndeshje me rezultatin 3-0. Fitore kjo e 11-ta në këtë sezon, që shoqërohet dhe nga një barazim. Ky është një fillim sezoni perfekt për katalanasit, por në këtë sfidë përveç rezultatit është festuar edhe zhbllokimi i Luis Suarez i cili ka shënuar dy gola, pasi la pasur shumë vështirësi para portës këtë sezon. Në mbrëmje do të zhvillohet edhe derbi i Madridit që do ti japë mundësinë Barcelonës të lejë akoma më mbrapa njërin nga rivalët kryesorë.
Protagonisti i fitores së ekipit “blaugrana” ka qenë Luis Suarez. Sulmuesi nga Uruguaj shënoi golin e avantazhit, kur u mbush gjysmë ore lojë, duke përfituar nga një hezitim i portierit mik. Në këtë mënyrë, katalanasit shënuan në të vetmen goditje që bënë në kuadrat gjatë gjithë pjesës së parë. Ndërkohë, në minutën e 60-të, Suarez shënoi me portën e boshatisur, me një akrobaci të bukur. Ky ishte dygolëshi i parë për Suarez në këtë sezon. Golin e tretë për miqtë e shënoi Paulinho, në minutën e fundit.
