Barcelona pret Real Sociedatin dhe kërkon fitoren e parë, pas dy humbjeve radhazi. Ndeshja luhet në “Camp Nou”, në orën 20:45 dhe Luis Enrique është nën presion, pasi lojtarët kanë një ngarkesë të madhe muskulore dhe në mesjavë kanë ndeshjen për “jetë a vdekje” kundër Juventusit.
Luis Enrique nuk disponon luksin për të lënë në pankinë yjet e ekipit, gjë që e bëri Zidane në ndeshjen kundër Gijonit të fituar 2-3 falë performancës fantastike të Iscos. Pamundësia e Enriques vjen për faktin, se në rast dështimi në ndeshjen e sotme, atëherë Reali shkëputet me 6 pikë para dhe me një ndeshje më pak. Presioni i Realit të Madridit e detyron trajnerin blaugranas të luajë me yjet e tij dhe të mos ketë kohë të mjaftueshme për të menduar për supersfidën ndaj Juventusit.
Barcelona sonte i kthehet formacionit 3-4-3, formacion, të cilin e përdori në sfidat kundër Celta Vigos fituar 5-0, Valencias fituar 3-0 dhe Sevillias fituar 4-2.
