Trajneri i Dinamos, Ilir Daja komentoi barazimin pa gola ndaj Teutës.
“Po ta marr në total do të them që jemi të kënaqur me pikët për atë që prodhuam. Durrësi ishte më kërkues se ne, kishte raste para portës. Neve nuk po na funksiononte sot, ndoshta ngaqë kemi pasur mungesa edhe në fundjavë. Kemi kontigjent lojtarësh që luajnë futboll. Ashtu si erdhi ndeshja, unë po mendoja se 1 pikë e marrë në Durrës është mjaft e mirë në krahasim me humbjen.
Pa i hequr meritat Teutës, ishte më lart se ne në këtë ndeshje. Nëse nuk ke pasime sidomos në zonat e ndërtimit, natyrshëm që nuk mund të flasësh për taktikë. Gjuha e futbollit është pasimi. Ne sot nuk e kishim këtë gjë, kishim shkarkim nga ana e mbrojtasve. Linja e parë nuk funksionoi sot. Ne u munduam të ndryshonim vendosjen, por nuk kishim më pika pasimi, kjo edhe për meritë të kundërshtarit. Lojtarët tanë me cilësi që nuk posedojnë dot topin, nuk shkon dot më tej të flasësh për taktikë.
Nuk e kemi hequr këmbën nga gazi, por kemi pasur stacione ku na kanë zbritur lojtarë për dëmtime apo viroza stine. Sot mungonte Bregu. Kur mungojnë 6-7 lojtarë të formacionit, sado ta mbash këmbën te gazi, xhirot janë më të ngadalta. Nga java tjetër të rikthehen 2 lojtarë, duke shpresuar që mos të na sëmuret ndonjë tjetër. Me plotësimin e kontigjentit, do rikthehemi me këmbën në gaz”, është shprehur Daja.
