Barazimi historik me Ajaksin, presidenti Meta nderon futbollistët e 17 Nëntorit

48 vite më parë, më 16 shtatorit të vitit 1970 është arritur rezultati më i madh në arenën ndërkombëtare nga një klub shqiptar. 17 Nëntori kampion i Shqipërisë në atë vit priste në Tiranë kampionët e Holandës, Ajax Amsterdam, ndeshje e vlefshme për Ligën e Kampionëve.

Ndeshja filloi shumë keq për 17 Nëntorin, pasi në minutën e 19’ dhe të 58’, dy golat e Surbier i japin avantazhin Ajaksit të madh, por entuziazmi i tifozëve u jep zemër futbollistëve të cilët me dy gola, përkatësisht në minutën e 60’ dhe 85’ me autorë Kazanxhi e Çeços, arrijnë të marrin barazimin.

Me rastin e përvjetorit të 48-të nga ky barazim, Presidenti i Republikës, Ilir Meta, ka zhvilluar një ceremoni në ambientet e presidencës, për të nderuar atë ekip që arriti barazimin historik më 16 shtator të 1970. Të ftuar ishin figura të njohura të klubit bardheblu, apo edhe sportit shqiptar, si dhe futbollistët aktual të Tiranës.

Gjithashtu në këtë mbrëmje, Presidenti Ilir Meta, ka vlerësuar me dekoratën, “Kalorës i urdhërit të Skënderbeut”, ish futbollistin e 17 Nëntorit, Skënder Halili. Gjatë fjalës së tij, Ilir Meta ka vlerësuar kontributin e Skënder Halilit në sportin e futbollit, duke u shprehur se ai është një legjendë e futbollit shqiptar. “Skënder Halili është një legjendë e futbollit shqiptar. Një model i përkryer për të gjithë. Nga të gjithë nderohet sot si futbollist i madh”-tha ndër të tjera Meta.