Dhjetëra banorë të Roskovecit dolën sot në protestë kundër ndërtimit të një termocentrali me kapacitet prej 170 MW, i cili është miratuar nga qeveria dhe pritet të funksionojë me gaz natyror.
Banorët shprehën shqetësime serioze për ndikimin që termocentrali mund të ketë mbi mjedisin, shëndetin dhe bujqësinë e zonës. Ata paralajmëruan se përdorimi i gazit do të shkaktojë ndotje të konsiderueshme dhe helmim të ajrit, duke ndikuar negativisht në shëndetin e popullatës, veçanërisht të fëmijëve, si dhe në bujqësinë e zonës që është burimi kryesor i të ardhurave për banorët.
Ata kritikuan ashpër faktin se vendimi për ndërtimin e termocentralit është marrë pa përfshirjen dhe konsultimin e komunitetit.
Në shenjë revolte, protestuesit dogjën një nga shtyllat e vendosura për shënimin e zonës ku pritet të fillojë ndërtimi. Banorët janë zotuar të kundërshtojnë projektin deri në fund dhe kanë paralajmëruar se do ta çojnë çështjen deri në Parlamentin Europian. Ata e konsiderojnë projektin një kërcënim për të ardhmen e tyre dhe të fëmijëve, duke theksuar se ndërtimi i termocentralit nuk është zgjidhja e duhur për zhvillimin e zonës.
Sipas vendimit të Këshillit të Ministrave, ndërtimi i termocentralit pritet të përfundojë brenda 36 muajsh nga hyrja në fuqi e vendimit, ndërsa periudha e operimit të tij është parashikuar të zgjasë 49 vjet.
