Drejtuesi politik i Partisë Demokratike në Qarkun e Fierit, Gazment Bardhi, gjatë një takimi në Lushnjë për prezantimin e kandidatëve për deputetë, ka sulmuar Belinda Ballukun, drejtuesen politike të PS-së për Fierin, duke e akuzuar atë për korrupsion dhe arrogancë të pushtetit. Bardhi e ka cilësuar Ballukun si “simbolin më domethënës të korrupsionit” dhe një person që është “i fryrë nga arroganca e pushtetit 12-vjeçar”.
Në fjalën e tij, Bardhi ka theksuar se PS ka abuzuar me pushtetin dhe se Balluku ka përdorur paratë e pista për të blere dinjitetin e qytetarëve të Fierit. Ai ka folur gjithashtu për krimin e organizuar, duke akuzuar Ballukun dhe të afërmit e saj për lidhje me figura kriminale, përfshirë Laureta Omerin, të cilën e ka përshkruar si një grua të lidhur ngushtësisht me krimin dhe që përdor presion dhe para të pista për të nënshtruar qytetarët.
Bardhi i bëri thirrje qytetarëve të Fierit që të mos nënshtrohen ndaj presionit të pushtetit, dhe i kërkoi atyre të votojnë për alternativën e PD-së, duke i siguruar se ekipi i PD është shumë më i ndershëm dhe është si “nata me ditën” krahasuar me PS-në. Ai theksoi se krimi dhe korrupsioni që janë pjesë e qeverisjes së PS-së do të mbarojnë dhe ekipi i PS-së do të shkojë “prapa hekurave”.
“Përballë kemi Belinda Ballukut, simbolin më domethënës të korrupsionit. Njeriun e fryrë nga arroganca e pushtetit 12-vjecar. Kemi njeriun që me paratë e pista mendon se do të blejë dinjitetin e lushnjarëve dhe qytetarëve të qarkut të Fierit.
Kemi njeriun që nuk ka respekt për socialistë e ndershëm, jo më për qytetarët e zakonshëm dhe pa parti. Njeriun që ka pushtuar si bandë qarkun me vartësit e saj, ku shkëlqen këtu në Lushnjë famozja Laureta Omeri, e cila kalon çdo sekond të ditës me krimin e organizuar, gjurmon jetën e secilit prej jush, me shpresën se do ti nënshtrojë me presion dhe para të pista.
Ju siguroj se është vetëm çështje kohe. Ekipi i zullumit dhe korrupsionit do të shkojë prapa hekurave”, tha Bardhi.
