Ministrja e Jashtme bullgare Ekaterina Zaharieva, është shprehur se ka faktorë të huaj kanë një ndikim të fortë në Ballkanin Perëndimor.
Sipas saj, përgjegjësia për këtë qëndron në Bashkimin Evropian, sepse nuk ishte mjaft i angazhuar në rajon.
“Ekziston një ndikim (i huaj), është faji ynë, ne nuk jemi mjaft të pranishëm dhe të angazhuar në vendet e Ballkanit Perëndimor”, tha Zaharieva për Komitetin e Parlamentit Evropian për Punë të Jashtme, njoftoi Beta, duke cituar Radio Evropa e Lirë.
“Nëse nuk jemi atje, atëherë dikush tjetër, i cili nuk është pjesë e familjes sonë evropiane apo e NATO-s, është prezent dhe do ketë një ndikim të fortë”.
Duke paraqitur prioritetet e presidencës bullgare të BE, Zaharieva konfirmoi se Ballkani Perëndimor është përparësia më e rëndësishme dhe se rajoni është shumë i rëndësishëm për të gjithë kontinentin.
“Ne besojmë fort se nuk mund të ketë stabilitet apo siguri në Evropë pa stabilitet dhe siguri në Ballkanin Perëndimor”, tha Zaharieva.
