Ministri i Brendshëm, Taulant Balla, mëngjesin e sotëm ka zhvilluar një takim me pedagogë dhe drejtues të Univerisitetit të Tiranës.
Përmes një postimi në “Facebook”, Balla tha se në fokus të këtij takimi ka qenë nënshkrimi i marrëveshjes së bashkëpunimit mes Ministrisë së Brendshme dhe këtij Univeristeti në kuadër të programeve të ekselencës për Policinë e Shtetit.
Balla tha se trupa e policisë ka nevojë të rinovohet dhe të thellojë vetëpastrimin e saj. Më tej ai theksoi se në shtator do të dërgojë në Kuvend disa ndryshime në ligjin për Policinë e Shtetit.
“Sfida për një rritje cilësore të nivelit profesional dhe trajnimin e vazhdueshëm të punonjësve të Policisë së Shtetit është po ashtu një sfidë e hapur. Sfida për të pastruar Policinë e Shtetit ka hyrë natyrshëm në një fazë të re, e cila natyrshëm kërkon edhe partneritete me institucione që prodhojnë kuadro me nivel të mirë dhe cilësor arsimor”, tha Balla.
Aktualisht në tetë qarqe të vendit janë çelur aplikimet për t’u futur në Akademinë e Sigurisë, të studentëve që kanë përfunduar të dy ciklet e studimeve në fusha: drejtësi, ekonomi dhe IT, me mesataren 8 e sipër.
Aplikimet bëhen pranë drejtorive vendore të Policisë, ku aplikanti ka vendbanimin e përhershëm. Kuotat e pranimit në Akademinë e Sigurisë, të shtetasve që kanë përfunduar ciklin e parë dhe të dytë të studimeve të arsimit të lartë, në shkencat juridike, ekonomike ose kompjuterike, janë 100 dhe janë të ndara sipas nevojave të strukturave të Policisë në nivel vendor në drejtoritë respektive.
Kanë të drejtë të aplikojnë shtetasit që plotësojnë kriteret e përgjithshme, standardet dhe kriteret e veçanta që lidhen me konkurrimin:
Kriteret e përgjithshme janë:
– Të jetë shtetas shqiptar;
– Të mos jetë i përjashtuar nga Policia e Shtetit, strukturat e tjera të sigurisë kombëtare dhe të mos jetë larguar nga shërbimi civil;
– Të ketë zotësi të plotë për të vepruar;
– Të jetë në gjendje të mirë shëndetësore dhe i aftë fizikisht për të kryer detyrën;
– Të mos jetë i dënuar me vendim gjykate të formës së prerë, për kryerjen e një krimi apo për kryerjen e një kundërvajtjeje penale me dashje;
– Të ketë dëshmi të aftësisë së drejtimit të automjetit, të tipit B;
– Të plotësojë standardet dhe kriteret e veçanta që lidhen me konkurrimin;
– Të plotësojë kriteret për t’u pajisur me vërtetim besueshmërie.
Standardet dhe kriteret e veçanta që lidhen me konkurrimin janë:
a. të ketë përfunduar studimet në ciklin e dytë të studimeve të arsimit të lartë, në shkencat juridike, shkencat ekonomike ose në shkencat kompjuterike;
b. të jetë në moshë jo më shumë se 30 vjeç;
c. të ketë mesataren mbi 8 të notave, në ciklin e dytë të studimeve të arsimit të lartë;
d. të jetë me gjatësi jo më pak se 170 cm për meshkujt dhe 160 cm për femrat;
e. të zotërojë gjuhën e huaj angleze, në nivelin mbi 60 pikë, sipas standardit ALCPT;
