Në fund të varrimit të vajzës së tij, Ilaria Sula, babai i saj, Flamur Sula, me lot në sy kërkoi drejtësi për vdekjen tragjike të 22-vjeçares. Ai tha se Ilaria ishte “një fëmijë i artë, një engjëll” dhe theksoi se ajo nuk meritonte një fund kaq të tmerrshëm.
“Ajo ishte një fëmijë i artë, një engjëll. Ai duhet të kalbet në burg”, tha Flamur Sula me dhimbje, duke shprehur shpresën se drejtësia italiane do të veprojë në mënyrë të drejtë.
Në ceremoninë e varrimit, që u mbajt në Terni, Kryetari i bashkisë, Stefano Bandecchi, e cilësoi vrasësin e Ilaria-s si “një djall” dhe një njeri ‘të padenjë për t’u quajtur burrë’. Ai shprehu ngushëllime dhe solidarizimin e tij me familjen e 22-vjeçares shqiptare.
Më shumë se tre mijë njerëz morën pjesë në varrimin e 22-vjeçares, duke i dhënë lamtumirën e fundit dhe duke nderuar jetën e Ilaria-s. Ajo u masakrua me thikë nga ish-i dashuri i saj filipinas, i cili, pas krimit, hodhi trupin e pajetë në një greminë pasi e kishte futur në një valixhe.
Ky rast ka shkaktuar tronditje të thellë dhe ka rikthyer shqetësime për dhunën në marrëdhënie dhe nevojën për një reagim të fortë të shoqërisë dhe autoriteteve.
