Gjatë mesditës së sotme, Prokuroria e Tiranës ka dhënë pretencën duke kërkuar dënimin me 1 vit burg për deputetin Tom Doshi, dhe ish-deputetin Mark Frroku.
Organi i akuzës ka kërkuar 1 vit burg edhe për Durim Bamin, por për shkak të gjykimit të shkurtuar, secili prej tyre sipas Prokurorisë duhet të kalojë 8 muaj pas hekurave. Të tre këta persona akuzohen për kallëzim të rremë për “atentatin” e supozuar ndaj deputetit Tom Doshi. Dosja e kësaj çështjeje të shumëpërfolur qëndroi për muaj të tërë e bllokuar në Gjykatën e Lartë, dhe më pas ka lëvizur në Gjykatën e Krimeve të Rënda, dhe më pas sërish në Gjykatën e Lartë.
Çështja bëri bujë në vitin 2015, kur deputeti Tom Doshi tha publikisht se kishte zbuluar një atentat që do të bëhej ndaj tij.
Dosja në fjalë
Ngjarja e bujshme e ka zanafillën në vitin 2015, kur Tom Doshi tha publikisht se kishte zbuluar një atentat që do të bëhej ndaj tij. Doshi akuzoi për përfshirje në këtë ngjarje edhe Presidentin Ilir Meta, që në atë kohë ishte kryetar i LSI.
Dosja e famshme qëndroi gjashtë muaj e bllokuar në Gjykatën e Lartë, dhe më pas ka lëvizur sa atje në Gjykatën e Krimeve të Rënda dhe më pas sërish në Gjykatën e Lartë. Gjithë kjo amulli është krijuar për shkak të dispozitave kalimtare dhe kompetencave lëndore të gjykatave aktuale, deri në krijimin e Strukturës së Posaçme Antikorrupsion.
Kjo çështje bëri bujë në vitin 2015, kur deputeti Tom Doshi tha publikisht se kishte zbuluar një atentat që do të bëhej ndaj tij. Ai madje akuzoi për përfshirje edhe ish-kreun e LSI-së, Ilir Meta.
Deputeti Doshi publikoi përmes mediave një intervistë të kryer nga ai vetë me Durim Bamin, i cili pretendonte se ishte porositur për të eliminuar fizikisht Doshin dhe ish-deputetin e PD-së, Mhill Fufin.
Intervista e realizuar në banesën e deputetit shkaktoi shumë trazira politike, por për organin e Akuzës gjithçka ishte e rreme dhe tashmë, si Durim Bami ashtu edhe Tom Doshi janë nën akuzë për kallëzim të rremë.
