Gjykata e Posaçme pranoi kërkesën e prokurorit Adnan Xholi dhe vendosi kalimin për gjykim të çështjes në ngarkim të Amar Shkumbit dhe Bledar Polivës, të cilët dyshohet se kanë qenë të përfshirë në atentatin ndaj ish-prokurorit Arjan Ndoja në mbikalimin e Shkozetit.
Vendimi u dha nga gjyqtari Bib Ndreca, ndërsa ditët në vijim do të hidhet shorti për të përcaktuar treshen e gjyqtarëve që do shqyrtojë dosjen penale në themel.
Amar Shkumbi ishte shpallur në kërkim nga SPAK për këtë ngjarje, ndërsa u ekstradua nga Dubai në Tiranë në tetor të vitit të kaluar për llogari të autoriteteve shqiptare.
Sipas hetimeve të kryera nga Prokuroria e Posaçme, Shkumbi, së bashku me Bledar Polivinë, Plaurent Dervishajn, Julian Meçajn dhe Ariol Halilajn kanë vepruar si “Grup i strukturuar kriminal”, duke kryer veprat penale të:
“Vjedhjes” në formën e veçantë të bashkëpunimit,
“Mbajtjes pa lejë të armëve”,
“Vrasjes së funksionarëve publikë” mbetur në tentativë,
“Vrasjes në rrethana të tjera cilësuese”,
Këto vepra janë kryer në kuadër të ngjarjes së regjistruar më 1 nëntor 2019, ku mbeti i vrarë Andi Maloku dhe u plagosën Arjan Ndoja dhe Aleksandër Laho, i njohur ndryshe si “Rrumi i Shijakut”.
Në të njëjtën çështje penale janë edhe të pandehurit Endrit Sinani, Genti Nderjaku, Bashkim Haxhia dhe Julian Pjetri.
