Kryetari i Partisë Republikane, Fatmir Mediu, ishte i pranishëm në takimin e organizuar nga PD me mësuesit. Gjatë fjalës së tij, Mediu theksoi se arsimi në Shqipëri është lënë në harresë me qëllim nga qeveria Rama, pasi “injoranca kontrollohet më lehtë”.
Ai vlerësoi punën e mësuesve dhe rolin e tyre si shtyllë kryesore e shoqërisë, duke shtuar se i takon opozitës të ndryshojë varfërinë dhe mosdijen në vend.
“Arsimi është baza për të ardhmen e shoqërive. Është lënë në harresë me qëllim, pasi frika, injoranca dhe varfëria janë më të lehta për t’u kontrolluar. Qeveria e Edi Ramës bazohet mbi këta elementë. Na takon neve ta ndryshojmë këtë realitet,” tha Mediu.
Ai gjithashtu bëri thirrje për pjesëmarrje në zgjedhjet e 11 majit, duke theksuar se kjo është një mundësi për të ndalur korrupsionin dhe për të ndërtuar një Shqipëri më të mirë.
“Mësuesi është si qiriri që digjet për të ndriçuar jetën e të tjerëve, arsimi është baza për të ardhmen e shoqërive, përulem para jush, mësuesve, pedagogëve të mi, uroj festën e dua t´i uroj festën Z.Berisha si një nga pedagogët më të jashtëzakonshëm që ka njohur plejada ime si student.
Jemi në një moment historik, momentin për të bërë atë që duhet për fëmijët tanë, familjet dhe arsimin në Shqipëri. Arsimi është lënë në harresë me qëllim, pasi frika, injoranca e varfëria janë më të lehta për t´u kontrolluar dhe qeveria e Edi Ramës e ka më të lehtë të bazohet mbi këta elementë. Varfërinë dhe mosdijen, na takon ne ta ndryshojmë, pasi ndryshe Shqipëria nëse s´ngrihet me diasporën më 11 maj, do të shkojë në harresën e honës së korrupsionit.
Problemet e mëdha në shkolla, droga, prostitucioni kanë të bëjnë dhe me arsimin e dijen. Shqipëria madhështore që thotë Berisha, është Shqipëria madhështore e Kamzës, pedagopgëve dhe njërëzve të thjeshtë dhe ne do ta bëjmë Shqipërinë madhështore”, tha Mediu.
