Policia e Tiranës ka vënë në pranga një 26-vjeçar nga Kazakistani, i shpallur në kërkim ndërkombëtar për veprën penale të mashtrimit. Arrestimi u realizua në kuadër të operacionit policor të koduar “Fugitive”, falë bashkëpunimit mes specialistëve të Hetimit të Krimit Ekonomik dhe Financiar të DVP Tiranë dhe Interpol Tiranës.
I riu, i identifikuar me inicialet A. T., u ndalua në bulevardin “Gjergj Fishta”, pasi ndaj tij ishte lëshuar një urdhër arresti nga Gjykata për Hetimet Speciale në Almaty, Kazakistan, e cila i ka caktuar masën e sigurisë “arrest në burg” për akuzën e mashtrimit, në përputhje me legjislacionin penal të atij shteti.
Policia bëri të ditur se procedurat për ekstradimin e tij drejt Kazakistanit janë në vijim, në bashkëpunim të ngushtë me autoritetet përkatëse të këtij vendi.
