Ish-drejtoresha e Spitalit Rajonal të Dibrës, Irini Shehu, e shkarkuar disa javë më parë pas një episodi dhune ndaj shefit të financës, vijon të përballet me probleme të rënda ligjore.
Pas incidentit fillestar ku goditi me një mjet metalik Shaban Uklalën, i cili më pas e denoncoi në polici, Shehu po hetohej në gjendje të lirë. Megjithatë, raste të tjera denoncimesh nga punonjës të tjerë të spitalit kanë komplikuar më tej situatën e saj. Ajo akuzohet për fyerje dhe kërcënime, përfshirë një rast të fundit ku dyshohet se ka kërcënuar një shtetase përmes sms-ve dhe telefonatave.
Pavarësisht ndalimit për të hyrë në ambientet e spitalit, Shehu është paraqitur atje duke shkaktuar përplasje të reja me stafin. Si pasojë, prokuroria ka urdhëruar arrestimin e saj. Aktualisht, ajo ndodhet në një nga dhomat e spitalit nën mbikëqyrjen e policisë, duke pretenduar probleme shëndetësore për të shmangur ekzekutimin e urdhër-arrestit.
Vetë Irini Shehu e ka konsideruar vendimin e prokurorisë si “të paligjshëm dhe të pabazuar në prova”.
