Analisti Fatos Lubonja, i ftuar në studion e News 24 foli për arrestimin nga SPAK të kryetarit të Bashkisë së Tiranës, Erion Veliaj. Lubonja u shpreh se Rama nuk ka sulmuar SPAK, por prokurorin e gjyqtarin e çështjes.
“Edi Rama nuk ka sulmuar SPAK, por sulmoi prokurorin dhe gjyqtarin. Ai përdori gjuhë intimiduese e kërcënuese e penguese të drejtësisë. Kreu i qeverisë premtoi se do të bëjmë drejtësi me standarde të vërteta, pas zgjedhjeve, pasi të fitojmë. A është kjo gjuha e një njeriu që kërkon drejtësi? Problemi në thelb është shkalla e kontrollit. Ai kontrollon, por nuk kontrollon të gjithë njerëzit në sistemin e drejtësisë. Altin Dumani nuk sulmohet as nga Rama e as nga Veliaj. Pakti ka qenë që ne do iu shesim si të pavarur, do godisni peshqit e mëdhenj nga PD, e opozita, por edhe disa nga ne më të vegjël. Kjo që bëri Rama është krim, sepse po tenton të pengojë drejtësinë. Rama po sulmon që ta nënshtrojë tërësisht SPAK-un. Rama shantazhoi drejtësinë”, tha Lubonja.
Më tej, Lubonja shtoi se Veliaj është në akuzë vetëm për disa afera. Ai nënvizoi se në një parti autoritare, siç është sot PS, njëshi është gjithçka.
“Veliaj nuk u godit si pjesëtar i një organizate, me kryetar kryeministrin, për mendimin tim, por goditet për gjëra të tjera. Në SPAK disa do tregojnë profesionalizëm. Vetëm gjyqtari Erjon Bani kishte pasur guxim që të hapë dosjen. Rama e ka pasur si qëllim që në fillim që të kapë reformën në drejtësi.
Unë e kam me sistemin, nëse SPAK do të bënte punë të mirë, do kishim demokraci, do kishim treg më konkurrues. Mund të mbështesim këta prokurorë, por a mund të ndodhë që të rregullohet gjithë sistemi demokratik? Veliaj është i rëndësishëm, por në partitë autoritare njëshi është gjithçka. Rama duhet të ketë frikë vërtetë, e jo kur shoh pastrimin e parave në mes të Tiranës në pallate të dhëna me lejen e tij, e sërish ai nuk ka frikë. Edhe policia duhet të jetë e pavarur. Vetëm KLGJ reagoi, as SPAK nuk reagoi për kërcënimin që mori direkt nga kryeministri”, u shpreh Lubonja.
Po ashtu, Lubonja vlerësoi se Veliaj mund të hetohet edhe në gjendje të lirë, por se ekziston frika se mund të prishë provat.
“Erion Veliaj mund të hetohej edhe në gjendje të lirë. Kjo sepse është ngritur edhe problemi se jepen shumë masa të ashpra nga gjykatat, duke izoluar njerëzit. Por, është problemi i prishjes së provave. Prishja e provave është një argument, për t’u arrestuar. PS po mbron diçka që nuk mbrohet, që kur doli 5D ose inceneratorët”, tha ai.
I pyetur për deklaratën e Berishës se do që të shkrijë SPAK-un, Lubonja deklaroi se duket se kjo deklaratë ka konflikt interesi, pasi kreu demokrat është akuzuar vetë nga SPAK.
“PD ka kontradiksion në raport me SPAK. Berisha ka konflikt interesi, sepse është akuzuar vetë nga SPAK. Sali Berisha mund të bënte drejtësi ndryshe, por sërish do donte që gjyqtarët e prokurorët të jenë nga ana e vet. Kështu e mendon edhe Berisha. Që të kesh drejtësi të pavarur, duhet që policia të jetë e pavarur. Ne 2 milionë e pak jemi, SHIK duhet të zbulonte krimin, mediat duhet t’i kesh të lira. Nëse do bësh këtë do kesh drejtësi të pavarur. Sistemin klientelist që përdor sot Veliaj ka përdorur edhe Berisha. Ose, këta gjyqtarë e prokurorë që kemi duhet t’ju jepim besim, që të jenë të pavarur e të sjellin demokracinë e plotë. Por, sesa është vullneti, kjo është diçka tjetër”, përmbylli Lubonja.
