Deputeti i Partisë Demokratike, Tritan Shehu në një intervistë televizive foli për dosjen e kompleksit Partizani dhe akuzat ndaj ish-kryeministrit Sali Berisha dhe dhëndrin e tij Jamarbër Malltezi.
Shehu u shpreh se e gjithë çështja është goditje për Berishën, PD-në dhe opozitën, ndërsa shtoi se mënyra e arrestimit të Malltezit ishte një metodë tipike marksiste, pasi ai ishte duke pritur në aeroport bashkëshorten e tij, Argita Malltezi.
“Është e paimagjinueshme që kryetarit të opozitës t’i cenohet liria, pasi ai duhet të lëvizë për çështje politike. Këtu kemi të bëjmë me një skenar tipik të regjimit që bie ndesh me demokracinë. Është ngritur i tëri për të goditur, Berishën, PD-në dhe opozitën.
Është turp i botës masa e paraqitjes. Berisha nuk ka ndërmend të arratiset, do ishte qesharake të mendohet kjo, kryetari i opozitës nuk mund të pengohet të lëvizë të kryejë takime.
Këto janë metoda tipike marksiste. Shkon tjetri arrestohet, tërhiqet zvarrë teksa priste gruan. Nuk e kam vetëm për këtë rast, por edhe në përgjithësi. Nuk ka nevojë të tërhiqet zvarrë, kur mund të ishte thërritur për t’u paraqitur. Janë veprime për ata që i kap në flagrancë, që paraqesin rrezikshmëri.”, tha Shehu.
