Analisti Martin Leka, i ftuar në emisionin “Open” në News24, ka komentuar zhvillimet më të fundit lidhur me SPAK dhe deklaratat e kryeministrit Edi Rama ndaj prokurorisë, duke u ndalur te arrestimet e fundit në Universitetin Bujqësor të Tiranës.
Sipas Lekës, fakti që 24 persona nga fusha e arsimit janë marrë të pandehur me masa sigurie përbën një ngjarje tronditëse për një universitet si UBT dhe opinionin në tërësi.
Ai vuri në dukje se të akuzuarit janë akademikë dhe njerëz të shkencës, duke theksuar se procesi duhet të jetë transparent, për shkak të ndjeshmërisë së lartë publike që e shoqëron.
Analisti përmendi edhe deklaratën e zv/rektores së universitetit, e cila ka deklaruar para gjykatës se vepra e saj e vetme ishte se kishte propozuar digjitalizimin e laboratorëve në universitet.
