Sulmuesi i kombëtares shqiptare, Armando Sadiku bëhet zyrtarisht lojtar i Legias së Varshavës.
Sadiku ka firmosur një kontratë 3 vjeçare me kampionët e Polonisë.
Këtë mërkurë u zyrtarizua gjithçka kur në 24 orët e fundit ishte bërë e ditur që bomberi kuqezi pritej të kalonte vizitat mjekësore te klubi polak.
Sadiku i shtohet përforcimeve të shumta të Legias gjatë kësaj merkato vere, pasi vetëm pak ditë më parë klubi zyrtarizoi edhe blerjen e Hilberto Ferreiras nga Benfica.
Sezonin e ardhshëm sulmuesi i kombëtares pritet të jetë lojtari kryesor i skuadrës në këtë repart dhe konsiderohet si një prej blerjeve më të rëndësishme të verës.
Kartonin e Sadikut, Legia e bleu nga skuadra e Cyrihut, që sezonin e kaluar e huazoi te Lugano, ku falë golave të tij ekipi zviceran mundi të sigurojë dhe një vend në Evropë.
Sadiku nuk është lojtari i parë shqiptar që bëhet pjesë te Legia e Varshavës, pasi vitin e kaluar ishte dhe Besnik Hasi në rolin e trajnerit. Ky i fundit u shkarkua dhe pse kualifikoi skuadrën në fazën e grupeve të Ligës së Kampioneve.
