Kampionit të Evropës në WBU, Armand Cullhaj, i është dashur t’i ndërrohet kundërshtari për spektaklin e madh të sporteve luftarake “Final Fight”, që do të zhvillohet në Tiranë më 22 dhjetor 2018, pasi Slavisha Simenunovic është lënduar në ndeshjen e fundit që pati në Gjermani.
Kështu, menaxheri Avdyl Salihu ka reaguar shpejt, duke i sjellë Culhajt një emër të respektueshëm në boksin profesionist: bëhet fjalë për serbin Sinisha Kondiç, i cili ka 10 fitore në boksin profesionist dhe 9 humbje. Duhet theksuar se të gjitha fitoret që ai ka realizuar kanë qenë me K.O., por edhe humbjet që i ka pësuar i ka pasur 90% me K.O.
Sipas statistikave, pritet që ky duel të përfundojë para kohe. Vetë Cullhaj tha se nuk i interesojnë statistikat, sepse ai shkon drejt fitores së sigurt, shkruan Telesport.
“Për një sportist nuk është mirë t’i ndërrohet kundërshtari, por ja që ai u lëndua dhe u desh që të ndërrohet. Unë jam duke u përgatitur maksimalisht në klubin tim, por ndihem mirë, kështu që pres fitore në Tiranë. Apeloj tek fansat e mi, por edhe publiku shqiptar, të më përkrahin, sepse kam nevojë për mbështetje. Mendoj se do jetë një duel shumë interesant dhe i fuqishëm”, deklaroi për portalin për sporte luftarake “ArenaRing”, Armand Cullhaj.
Duhet theksuar se në këtë eveniment ndeshja kryesore do të jetë në K1, ku promotori i këtij evenimenti, Adriatik Cami, do të ndeshet për dy tituj bote, kundër marokenit, Ayoub Zerouali.
