Kryetari i Komunës së Preshevës, Shqiprim Arifi ka akuzuar partitë e tjera politike se po bëjnë propagandë për të mbijetuar politikisht.
I ftuar në emisionin “Zëri politik”, Arifi shpalosi programin elektoral për zgjedhjet e parakohshme të 24 dhjetorit, si dhe ftoi qytetarët e Komunës që “të vetëdijësohen dhe të kuptojnë se janë pjesë e një sistemi manipulativ, mashtrues nga partitë e vjetra”.
Kreu i Komunës së Preshevës u është përgjigjur edhe akuzave të drejtorit të Shtëpisë së Kulturës, i cili pretendoi se Arifi nuk ka kryer kalimin e rrogave të punëtorëve të këtij institucioni.
Arifi tha se këto akuza janë vetëm shpifje, duke hedhur poshtë edhe akuzat se nuk është bërë financimi i mjaftueshëm i shkollave në Komunën e Preshevës.
Ai ka ofruar një përmbledhje të buxhetit për vitin 2016 nga pushteti i Ragmi Mustafës si dhe për vitin 2017 e buxhetuar nga qeverisja e Shqiprim Arifit për shkollën fillore “Ibrahim Kelmendi”, shkollën e mesme teknike si dhe Gjimanazin “Skenderbeu” në Preshevë, ku janë të pasqyruara rritja e buxheteve në të tre shkollat e lart-përmendura.
