Gjykata e Posaçme e Apelit ka vendosur të prishë vendimin e mëparshëm të datës 21 maj 2019 të ish-Gjykatës së Apelit për Krime të Rënda, duke lehtësuar dënimet për disa anëtarë të grupit të Lazaratit, i dënuar më parë në total me 52 vite burg. Vendimet lidhen me ngjarjet e vitit 2014 në këtë fshat, që u bë i njohur për përplasjet me policinë dhe kultivimin masiv të kanabisit.
Sipas vendimit të ri të Apelit të Posaçëm, dënimet për disa prej të akuzuarve janë si më poshtë:
Arbjon Aliko: 10 vite burg (nga 13 vite më parë)
Gurgaz Skënderi: 8 vite burg (nga 11 vite)
Enrik Skënderi: 8 vite burg (nga 10 vite)
Alfred Proko: 9 vite burg (nga 10 vite në mungesë)
Ndërkohë, për shtetasin Beqo Brahimi, Apeli i Posaçëm ka vendosur pushimin e çështjes, pasi ai ishte më parë dënuar me vendim gjyqësor të formës së prerë për të njëjtat vepra penale – “Prodhimi dhe shitja e narkotikëve” dhe “Shkatërrimi i pronës me zjarr”. Në këto kushte, procedimi penal ndaj tij është konsideruar i mbyllur.
Vendimi vjen ndërkohë që banorët e Lazaratit kanë shprehur shqetësime për zhvillimet e fundit rreth legalizimit të kanabisit për qëllime mjekësore, duke i konsideruar këto politika si të padrejta ndaj komunitetit të tyre, i cili është përballur me ndëshkime të ashpra në të kaluarën.
“I futën në burg djemtë tanë, tani duan të kthejnë drogën!”: kanë deklaruar disa banorë, ndërsa administratori i zonës ka thënë se ligji i ri mund të sjellë punë dhe të ardhura.
