Anulohet vizita e Atifete Jahjagës në Beograd për shkak të protestave të serbëve. Ish-presidentja e Kosovës kishte planifikuar të mbante një fjalim në Beograd për gratë e dhunuara, në kuadër të festivalit “Mirëdita, DobarDan”, festival i cili ka nisur të mërkurën mbrëma, më 31 maj.
Sipas një prej organizatorëve të këtij festivali, shteti serb nuk po lejon ardhjen e ish presidentes Atifete Jahjaga në Beograd, në promovimin e librit “Unë dua të dëgjohem”.
Ky është një libër kujtimi për gratë e dhunuara gjatë luftës në Kosovë, për të cilin Jahjaga do të mbante një fjalim. Megjithatë, duket se vizita e saj është anuluar për shkak se dy netët e para të festivalit, janë shoqëruar me protesta të serbëve. Natën e parë të festivalit një pjesë e nacionalistëve nuk janë penguar nga policia që të futen edhe brenda hapësirave ku mbahej performanca e aktorëve kosovarë.
Ndërkohë, lidhur me ndalimin e vizitës së saj, ka reaguar vetë Jahjaga, e cila shprehet se Beogradi po vazhdon politikën e viteve ’90-të:
“Unë sot do të duhej të isha në Beograd për promovim të librit “Unë dua të dëgjohem” në kuadër të festivalit “Mirëdita, dobar dan!”, ku u ftova të mbaj fjalim për viktimat e dhunës seksuale gjatë luftës në Kosovë. Hyrja ime në shtetin e Serbisë u pamundësua me një arsyetim absurd. Përgatitjet për vizitën janë bërë në përputhje me Marrëveshjen e Brukselit për vizita të zyrtarëve të lartë. Autoritetet e Kosovës i kanë njoftuar me kohë dhe me përpikëri autoritetet e Serbisë, siç është e paraparë me marrëveshje, por zyrtarët në Beograd kanë dështuar t’i përmbahen kësaj marrëveshjeje, duke e shkelur atë me qëllim që të ndalojnë vizitën time.
Zyra ime dhe organizatorët e festivalit janë në komunikim të vazhdueshëm për të siguruar pjesëmarrjen time në këtë festival, me bindjen se pranimi i së vërtetës mbi krimet e luftës në Kosovë është e vetmja mënyrë që shoqëritë e dy vendeve të ecin përpara. Unë nuk kam iluzione që zyrtarët e sotëm të Serbisë do ta ndryshojnë qasjen ndaj Kosovës, sepse ata po e vazhdojnë politikën e viteve të 90-a kur kanë qenë edhe protagonistë. Por dua të shpreh respektin tim për organizatorët e festivalit, një grup të rinjve dhe aktivistëve që nuk do të lejojnë që e ardhmja e tyre dhe e tërë rajonit të mbahet peng nga këta udhëheqës që duan ta fshehin të vërtetën. E vërteta nuk njeh kufij”, ka shkruar ajo.
