Ansambli me rreth 40 vajza të Liceut Artistik “Jordan Misja”, për herë të parë kënduan dhe promovuan vlerat kulturore, artistike, qytetare dhe evropiane në Berlin.
Me ftesë të dirigjentes berlineze Sabine Wüsthoff, Kori i Vajzave të Tiranës të Liceut Artistik, i përgatitur me nivel të lartë profesional e artistik nga dirigjentja Ermira Alliu, ishin një surprizë e bukur artistike për publikun e Berlinit.
Në sallën e Lindenkirche, publiku i pranishëm mirëpriti dhe duartrokiti këngët e kompozitorëve evropianë si STARS,O Salutaris, Mundi Renovation si edhe këngët shqiptare të shkruara nga Simon Gjoni, Milto Vako etj.
Kënga “Bie Lodra “ e kompozitorit Milto Vako (njëkohësisht themelues i korit në vitet 1960), do të sillte një përjetim shumë të veçantë sa për intonacionet, aq dhe për ritmin karakteristik të muzikës sonë kombëtare.
Ambasadori i Shqipërisë në Berlin, Artur Kuko, u shpreh i entuziazmuar duke e cilësuar korin e vajzave të Liceut Artistik të Tiranës si “Ambasadorët e vërtetë të Shqipërisë”, ndërsa vlerësoi së tepërmi këtë zhvillim të ri midis Korit të vajzave të Berlinit dhe Korit të Vajzave të Liceut Artistik “Jordan Misja”.
