200 familje në fshatin Martinë të Levanit, Fier, po përballen prej më shumë se një muaji e gjysmë me ujë të ndotur në çezmat e tyre.
Situata është pasojë e dëmtimit të tubacionit të ujësjellësit gjatë punimeve të Bashkisë Fier për pastrimin e kanaleve vaditëse. Për të siguruar ujë të pijshëm, banorët detyrohen të blejnë ujë nga autobotet, duke përballuar një barrë të dyfishtë ekonomike, pasi paguajnë si për faturat e ujësjellësit, ashtu edhe për ujin e blerë.
Pavarësisht riparimeve të kryera nga ujësjellësi, tubacionet dëmtohen përsëri për shkak të peshës së makinave të rënda që punojnë në zonë. Sipas përfaqësuesve lokalë, zgjidhja e vetme për këtë problem është instalimi i një linje të re ujësjellësi me 1500 metra linear tuba.
Rrjeti aktual i ujësjellësit është ndërtuar 30 vite më parë dhe tashmë është plotësisht i amortizuar. Banorët presin që investimi i premtuar të realizohet sa më shpejt për t’i dhënë fund vështirësive që po përballojnë.
