Golat e dy kosovarëve përballë Serbisë dhe festa duke bërë simbolin e shqiponjës me duart e tyre është komentuar gjatë pas asaj ndeshje. Të shumtë kanë qenë figurat politike, këngëtarë, artistë dhe të gjithë shqiptarët që kanë shkruar fjalë të mira për ta dhe se i bënë krenarë. Por Granit Xhaka dhe Xherdan Shaqiri edhe janë sulmuar shumë nga mediat serbe, të cilat kanë shkuar shumë larg duke i kërkuar edhe FIFA-s të marrë një masë ndëshkuese ndaj lojtarëve, pasi e cilësojnë si provokim gjestin e shqiponjës gjatë festës.
Vlora Çitaku, Ambasadore e Kosovës në SHBA, ka shkruar pas ndeshjes së golat e shqiptarëve Xhaka e Shaqiri janë historikë për Kosovën. “Dy shqiptarë të Kosovës kanë vendosur fitoren e Zvicrës ndaj Serbisë. Familjet e tyre kanë shkuar në Zvicër gjatë kohës së luftës, sot (dje) ata shënuan dhe fituan. Sporti ndonjëherë është më shumë se sport. Jeni pjesë e historisë, ju dua shumë”,–shkruante Çitaku.
Dy futbollistët kosovarë janë akuzuar nga Beogradi se kanë festuar me provokime, duke bërë simbolin e shqiponjës për ‘Shqipërinë e madhe’. Si Xhaka, edhe Shaqiri, u shprehën se e kanë bërë atë gjest për familjet e tyre dhe popullin e tyre, jo kundër Serbisë. Kritika ka pasur edhe nga shtypi zviceran.
