Mesa duket fati është me të, Leonardo Bonucci është shumë pranë rikthimit tek Juventusi. Kjo ishte dëshira e mbrojtësit italian, i cili vetëm një sezon më parë u largua nga Torino drejt Milanos dhe tashmë kërkon me çdo kusht rikthimin, madje duke pranuar dhe ulje rroge. Për këtë transferim e ka dhënë ‘ok’ dhe trajneri i bardhezinjve, Massimiliano Allegri:
“Rikthimi i Bonuccit? Marrëdhënia ime me Leon ka qenë gjithmonë e mirë, por gjatë karrierës sime si trajner kam pasur diskutime me shumë lojtarë. Nuk kam probleme me të. Juventusi ka pesë mbrojtës të shkëlqyeshëm, klubi mendon për merkaton”.
Drejtuesit e Juventusit janë në kontakte të vazhdueshme me drejtorin e ri sportiv të Milanit, Leonardon, i cili vetëm pak ditë më parë konfirmoi publikisht se dëshira e Bonuccit ishte Juventusi. Tani duket se kjo lëvizje është drejt vijës së finishit. Mbetet për tu vendosur se kush do të jetë i sakrifikuari tek Juventusi për të rikthyer Bonuccin.
Në bisedimet mes dy klubeve, palët po përpiqen të përshtatin të gjitha pjesët e operacionit: Bonucci, Caldara dhe Gonzalo Higuain. Për argjentinasin mbetet konkret edhe interesimi i ish-trajnerit të tij te Napoli, Maurizio Sarri. Ky i fundit po shtyn që ta ketë “Pipita” në dispozicion te Chelsea, ku është stacionuar si trajner këtë muaj.
