Enkelejd Albeaj ka reaguar para pak minutash lidhur me dokumentin që shfaqi sot para medies Saimir Tahir, ku thuhej se ky i fundit nuk po hetohet nga Prokuroria e Katanias.
Alibeaj tha se Prokuroria e Katanias ka arrestuar Habilajn sepse është kapur duke e kryer aktivitetin e tyre kriminal në Itali, ndërsa shtoi se është detyra e prokurorisë shqiptare që të hetojë Tahirin.
Sipas deputetit demokrat, Rama po pengon arrestimin e ish-ministrit, pasi kryeministri është i kapur, prandaj nuk e finalizoi kërkesën e Prokurorisë së Krimeve të Rënda.
FJALA E ALIBEAJT:
Prokuroria e Katanias ka arrestuar Habilajn dhe kërkon anëtarët e tjerë të bandës, sepse janë kapur duke e kryer aktivitetin e tyre kriminal në Itali, prandaj Prokuroria e Katanias nuk mund të arrestojë Tahirin në Tiranë, kjo është detyrë e Prokurorisë shqiptare. Këtë detyrë të prokurorisë, Edi Rama dhe Saimir Tahiri po e pengojnë duke mos pranuar kërkesën e saj. Aktakuza e mafias italiane për Tahirin ka fakte që tregojnë përfshirjen direkte dhe përfitimin nga trafikimi i tonelatava drogë. Çdo shqiptar do të ishte sot në burg, por Saimir Tahiri jo sepse ka mbrojtjen e Edi Ramës.
Arsyeja pse ai e mbron është se Rama është i kapur, pasi Tahiri nuk do rrinte duarkryq, ndaj Rama jo vetëm nuk e finalizoi kërkesën, por ka nisur edhe një sulm frontal ndaj prokurorisë.
Ndërkohë që ndaloi drejtësinë të bënte punën e vet, ama i dha kohë Tahirit të pastronte shtëpinë dhe të zhdukte provat.
Parlamenti shqiptar nesër ka provën nëse do zgjedhë drejtësinë, apo do marrë në mbrojtje krimin.
