Alibaba po investon 15 miliardë dollarë në një rrjet global laboratorësh hulumtues, që kanë si synim të sfidojnë dominimin e Silicon Valley në teknologjinë e së ardhmes. Investimi do të përdoret për ndërtimin e objekteve kërkimore gjatë tre viteve të ardhshme në Kinë, Shtetet e Bashkuara, Rusi, Izrael dhe Singapor.
Alibaba (BABA, Tech30) dëshiron që kërkimet të përqendrohen në informatikën kuantike dhe ndërveprimin mes njerëzve dhe makinave. Analistët thonë se kompania Alibaba duhet të ketë ritme sa më të shpejta inovacioni për të vazhduar.
“Është shumë e rëndësishme për Alibaba të vazhdojë të përparojë teknologjinë”, tha Kitty Fok, një analist me bazë firmën kërkimore IDC në Pekin.
“Kompanitë e teknologjisë amerikane kanë udhëhequr botën në të kaluarën. Tani janë kompanitë kineze ato që duhet të rriten në drejtim të investimeve”, tha Fok.
Ndërkohë Amazon (AMZN, Tech30), rival i madh i Alibaba, investoi më shumë se 16 miliardë dollarë në hulumtimet dhe zhvillimin e teknologjisë vitin e kaluar.
Një grup i quajtur “Akademia për zbulimin, aventurën, momentin dhe perspektivën” do të kryesojë projektin e Alibaba, me shefin e teknologjisë, Jeff Zhang.
“Ne jemi duke kërkuar hulumtues të talentuar që të na bashkohen në kërkimin dhe zhvillimin e teknologjisë së re”, tha Zhang në një deklaratë.
Alibaba po planifikon të rekrutojë 100 hulumtues në stafin e laboratorëve të rinj.
Sikurse shumë themelues miliarderë të teknologjisë, Jack Ma është një ‘futurist’. Ai parashikon se robotët do të zëvendësojnë disa drejtues të rëndësishëm dhe beson se inteligjenca artificiale do ta ndryshojë rrënjësisht botën. /Tirana Today/
