Ministria Holandeze e Mbrojtjes njoftoi se do të sigurojë 100 radarë për të zbuluar avionë pa pilot. Ky vendim vjen disa ditë pasi lëvizjet e dronëve shkaktuan alarm në Aeroportin e Eindhovenit dhe Bazën Ajrore Volkel. Sipas ministries Holandeze, këto janë sisteme me teknologji të përparuar, të prodhuara nga kompania holandeze Robin Radar.
“100 radarët nuk do të dorëzohen të gjithë në të njëjtën kohë”, sqaroi Ministria Holandeze e Mbrojtjes.
Të parët do të dorëzohen të premten dhe pjesa tjetër do të dorëzohet gradualisht, deri në fund të vitit 2026.
Javën e kaluar, aeroporti i Eindhovenit u mbyll për disa orë pasi u vunë re dronë në zonë. Forcat e armatosura holandeze përdorën sisteme armësh kundër dronëve që iu afruan bazës ajrore Volkel, e cila ndodhet 40 kilometra nga Eindhoven.
Lëvizjet e dronëve me origjinë të panjohur kanë shkaktuar trazira në disa vende evropiane në muajt e fundit.
