Ministrja e Kulturës, Mirela Kumbaro, është një personazh që ka bërë gafa qesharake, aq sa batutat janë kthyer në meme. Të gjithë e kujtojmë rastin kur uroi Krishtlindjet në vend të Pashkëve, duke shkaktuar të qeshura pafund në rrjetet sociale dhe jo vetëm.
Në rrjet shpërthyen disa fotomontazhe, duke ironizuar në forma të ndryshme Kumbaron, e cila e kaloi me mjaft sportivitet. Aq e madhe ka qenë gafa, saqë atë e kapi menjëherë Veliaj. Por kjo tashmë i përket së shkuarës.
Por ministrja Kumbaro duket se nuk ka “zënë mend” dhe nuk e mban gojën pa nxjerrë “xhevahirin” e radhës, teksa i është drejtuar të madhes Marjana Kondi me emrin Marjeta.
Dje gjatë mbledhjes me aktorët, ku pati revoltë të hapur nga ana e tyre, ka ndodhur edhe një përplasje mes aktores Marjana Kondi dhe ministres së Kulturës, Mirela Kumbaro.
Debati i tyre për pak sa nuk u kthye në një përleshje fizike, pas konfliktit të hapur të kësaj të fundit me drejtorin aktual Hervin Çuli, i cili e pushoi nga puna pas 30 vitesh kontribut në Teatër. Siç e zbulon edhe vetë aktorja në një sms të siguruar nga “BalkanWeb”, gjithçka ka ndodhur kur ministrja i afrohet për t’i dhënë dorën, duke iu drejtuar me emrin e gabuar; “ Si je Marjeta?”.
Kondi thotë se ia ka hequr dhunshëm dorën, duke iu përgjigjur “Hë mi Hajrie”, mëso emrat e punonjësve të tu një herë, debile, plehrë!”.
Aktorja e revoltuar vijon: “Ju të hiqni nga puna natën, e të qani ditën. Të jepni edhe dorën!”.
Ndërkohë që ministrja, siç ajo thotë e ka tejkaluar situatën, i ka thënë të qetësohet dhe ka vijuar të takojë aktorët e tjerë.
