Drejtoria e Përgjithshme e Tatimeve njofton se po vijon me intensitet aksioni për formalizimin dhe përmirësimin e sigurisë ushqimore në tregun e produkteve bujqësore dhe blegtorale, në bashkëpunim me Ministrinë e Bujqësisë.
Në një deklaratë zyrtare, theksohet se rezultatet e tri ditëve të para të aksionit kanë nxjerrë në pah nevojën urgjente për formalizim të plotë të këtij sektori, si një element thelbësor për cilësinë e produkteve dhe mbrojtjen e shëndetit të qytetarëve.
“Formalizimi i tregut bujqësor dhe blegtoral është i domosdoshëm për të garantuar sigurinë ushqimore dhe për të mbrojtur konsumatorët,” thuhet në njoftim.
Administrata Tatimore u bën thirrje të gjithë tatimpaguesve që të respektojnë legjislacionin duke lëshuar faturë fiskale në çdo hallkë të zinxhirit ushqimor – nga prodhuesi te tregtari dhe më tej te konsumatori.
“Lëshimi i faturës fiskale është thelbësor për të siguruar gjurmueshmërinë e produkteve dhe transparencën në treg,” apelon institucioni.
Ky aksion vjen si pjesë e një strategjie më të gjerë për rritjen e standardeve dhe luftimin e informalitetit në sektorin bujqësor dhe blegtoral, i cili përbën një hallkë të rëndësishme të ekonomisë dhe mirëqenies së qytetarëve.
