Ekipi i Tiranës do të ketë aksionarë të rinj, por duket se ata nuk janë të interesuar drejtpërdrejt në menaxhimin e klubit. Synimi i tyre kryesor është të investojnë në asetet e kryeqytetasve dhe të mos ndërhyjnë në pjesën sportive. Në një prononcim të tij për “Supersport”, Refik Halili hodhi idenë e ndërtimit të një stadiumi. Nuk është ide e pamenduar apo thjeshtë tymanjë në ajër, por ka një bazë reale, sipas faqes “Albania Team”.
Ende nuk ka diçka zyrtare, por informacione të ndryshme të dalë nga klubi bardheblu bëjnë me dije se me emri i përfolur më shumë për të ndihmuar ekipin është kompania “Kastrati”. Ata duan të investojnë te klubi bardheblu në asetet e kryeqytetasve dhe të mos ndërhyjnë në pjesën sportive. Ana e menaxhimit të ekipit, lojtarëve dhe drejtimi i skuadrës do t’i mbetet e drejtë ekskluzive e presidentit Refik Halili.
“Kastrati” do të investojë në asete, pikërisht në stadiumin që përfoli dhe numri një i klubit. Ata kanë ndërtuar një mini-projekt ku marrin përsipër rikonstruksionin e “Selman Stërmasit”, por normalisht nuk ka gjë pa gjë. Në këmbim do të kenë të drejtë të investojnë në një qendër tregtare, kullë dhe t’i japin një fytyrë të re sheshit para stadiumit.
Tirana do të përfitojë shlyerjen e borxheve, stadiumin e ri dhe do të ketë përqindje në shitjen e kullës. Çfarë do të përfitojë “Kastrati”? Kuptohet, nuk është nevoja të vihet në dukje.
Kryeqyteti dhe ekipi 24 herë kampion i Shqipërisë mund të futen në një investim super madhor. Situata nuk është aq e thjeshtë, pasi Bashkia duhet të miratojë projektin, por dhe kjo ide do të ketë shumë zëra kundër.
