Pesë të vdekur është bilanci tragjik i aksidentit rrugor të ndodhur pasditen e së martës në Edessa, Greqi, ku një makinë me targa shqiptare u përplas kokë më kokë me një kamion. Makina në pjesën e përparme u shndërrua në një masë amorfe, ndërsa zjarrfikësja e Edessas u thirr për të nxjerrë të vdekurit.
Aksidenti i rëndë ka ndodhur rreth orës 17:50 të pasdites, në kilometrin e 87-të të rrugës nacionale të Selanikut Follorinë, kur në rrethana ende të pazbardhura dy mjetet janë përplasur kokë më kokë e për pasojë të gjitha pasagjerët e automjetit tip “Benz” me targa Shqipëria humbën jetën.
Për nxjerrjen e pasagjerëve nga makina është dashur ndihma e 9 zjarrfikësve me 4 mjete, ndërsa drejtuesi i kamionit është dërguar i plagosur në spitalin e Edessë, jashtë rrezikut.
Sipas mediave greke, viktimat dyshohet se janë të huaj pa u plotësuar gjithsesi identifikimi i të dhënave.
Hetimet paraprake për shkaqet e aksidentit po kryhen nga Policia Rrugore e Edesës.
