Një aksident i frikshëm ka ndodhur mbrëmjen e sotme në qendër të qytetit të Beratit, ku një makinë ka humbur kontrollin dhe ka marr para mbajtëset metalike të rrugës dhe është përplasur me një shtyllë.
Mësohet se aksidenti ka ndodhur në qendër të qytetit, në vendin e quajtur “Axhensia”, në hyrje të parkimit nëntokësor dhe fatmirësisht nuk ka pasur asnjë kalimtar të lënduar.
Fuoristrada tip Mercedes Benz GL, me targa AB 473 AX, po qarkullonte me shpejtësi nga ish-merkatoja në drejtim të gjykatës, kur ka rrëshqitur dhe është përplasur me shtyllën.
Pas përplasjes, drejtuesi i mjetit e ka lënë makinën dhe është larguar nga vendngjarja. Në vendngjarje ndodhen forcat e policisë që po kryejnë edhe veprimet e para hetimore dhe që bën të mundur edhe hapjen e rrugës, që u bllokua për disa minuta.
Burimet zyrtare të policisë konfirmojnë se është identifikuar emri i pronarit të mjetit, por nuk dihet ende nëse ka qenë ai në drejtimin e mjetit apo jo.
Sipas policisë, po punohet për zbardhjen e shkaqeve të aksidentit dhe ndalimin e drejtuesit të mjetit që e shkaktoi aksidentin.
